Scomenciamënt dl ann de scora 2010/2011
Scomenciamënt dl ann de scora 2010/2011
In lönesc, ai 13/09/2010 à por les studëntes y i studënć dles scores altes da La Ila metü man l’ann de scora 2010/2011.
Do la S. Mëssa tla dlijia da La Ila s’à les studëntes, i studënć, les insegnantes, i insegnanć y döt le personal dla scora incuntè y metü man adöm l’ann de scora nü. Le diretur Albert Videsott à saludé la comunité dles scores altes y sotrissé la gran importanza de na buna formaziun tl monn complès d’al dedaincö. Ales studëntes y ai studënć ti al metü a cör da surantó instësc na pert dla responsabilité de süa formaziun, mostran tresfora interès, impëgn y dediziun por le laûr te scora. Ma insciö pon crësc ite dé por dé tl monn dles porsones adultes y contribuí a costruí la sozieté dl dagní.
Ales insegnantes y ai insegnanć ti le diretur aconsié da chirí gonot le dialogh cun les scolares/i scolari suradöt sön temesc che é de gran importanza por i jogn de nosc tëmp y da i daidé tl svilup dla personalité de vignöna/vignun.
