Leziun d’economia cun l’assessur Florian Mussner

Dl’ economia mondiala, nazionala y locala él gnü baié ai 23 demerz 2011 te n’ incuntada danter l’assessur por la scora y cultura ladina dot. Florian Mussner y la cuinta tlassa dl Istitut Tecnich Comerzial da La Ila. Al è stè na leziun particolara olache al s’à incrujé tröpes materies y noziuns che le stundëntes/i studënć à imparé te sü agn tl ITC. Dala situaziun tl Iapann y sües conseguenzes por le marcé mondial, dales poscibilitês de svilup dla Cina, dl’India y dl Brasil tl dagnì ćina ala problematica dl’energia che é y gnarà tresfora plü esenziala por nosta sozieté él gnü fat n cheder dla situaziun economico- politica d’al dedaincö. A livel local é l’assessur Mussner jü ite söles conseguënzes dl  pat de stabilité, dla convenziun de Milan danter la Provinzia autonoma de Südtirol y le guern talian, le bilanz provinzial y  le federalism fiscal.

Portan ite tröc ejempli de so laûr da vigni dé à l’assessur podü splighé concretamënter n valgönes  problematiches liades al’economia atuala y respogne ales tröpes domandes dles studëntes y di studënć. Deplü iadi l’assessur sotrissé la gran importanza dla formaziun dla jënt jona sciöche strumënt por mioré la situaziun y l’economia locala y mondiala. N dilan ti và al’insegnanta dr. Elisabeth Frenner por avëi programè y  coordiné l’incuntada.