Evaluaziun interna 2010/2011
Evaluaziun interna 2010/2011
Ala fin de aurí á les scores altes da La Ila metü a jí la valutaziun interna 2010/2011. Aladô dla dezijun dl Consëi dles insegnantes y di insegnanc se à la comunité dla scora dè jö in chësc ann cun le tema dl se stè saurí a scora. Vigni scora é d’un n vers n ambiënt de laûr, mo dl ater vers inće n post olache tröpes porsones passa vigni dé tröp temp – y porchël n ambiënt de vita.
Te grups à les studëntes/i studënć, les insegnantes/i insegnanć, le personal de scora y la direziun tut posiziun, mostran sö ći che va bun y ći che va manco bun tla strotöra de nosta scora. Por podëi descrì bun sü pinsiers à i grups fat fotografies y arjigné ca placać che é spo gnüs tacà sö tl’entrada dla scora y à metü a jí tröpes discusciuns.
Le Consëi dles insegnantes/di insegnanć à tratè tla sentada di 13 de mà i resultać dl’evaluaziun y laurè fora poscibilitês de mioramënt.
