Pröm dé de scora
Pröm dé de scora
L’ann de scora 2011/2012 à metü man tles scores altes da La Ila cun na bela funziun religiosa te dlijia y cun n’incuntada dles studëntes y di studënć cun les insegnantes, i insegnanć y le personal dla scora. Le diretur Albert Videsott à dè le bëgngnü ala comunité scolastica, saludàn te na manira particulara les prömes tlasses dl Istitut Tecnich Economich y dl Lizeum Linguistich.
Le scomenciamënt de n ann de scora é sciöche canche na ferata pëia ia, à dit le diretur – na ferata che condüj fora por le monn dla conoscënza, dla cultura, dl’ert y dles sciënzes. Al é n iade che ne é nia dagnora saurí y se ghira tröpa orentè, savëi y preparaziun; mo al é n iade che porta conoscënzes, formaziun y richëza inteletuala, mostran sö n gröm de trûs y poscibilitês tla vita tl dagnì.
La novité plü importanta de chësc ann é l’introduziun dla reforma dla scora alta tles prömes tlasses. Dlungia la modificaziun de n valgönes materies se damana la reforma inće mudamënć tla didatica y tla manira de odëi l’insegnamënt. Porchël à le diretur invié dötes cantes y düc canć a laurè cun impëgn, dediziun y responsabilité, odon tla reforma na poscibilité de miorè la formaziun de döta la comunité dla scora.
