Degügn ne dess restè indô
Degügn ne dess restè indô
Tratan le mëis de forà 2012 à les scores altes da La Ila metü a jì tröpes iniziatives de sostëgn y potenziamënt te deplü materies. Suradöt por les studëntes y i studënć che à ciafè valutaziuns negatives tles pageles de jenè à chestes ativitês pité na buna ocajiun por se trà do y aprofondì sües conescënzes. N’edema alalungia é l’orar de scora gnü metü sotissura, l’ativité didatica “normala“ s’é architada y ti à lascè le post a repetiziuns, aprofondimënć y proieć.
I consëis de tlassa à definì avisa sce la studënta/le studënt messâ frecuentè n curs intensif, imparè autonomamënter i contignüs dles materies negatives o studié cun les spligaziuns y i consëis di insegnanć. Y chi che ne à ciafè degöna valutaziun negativa? Te val’ tlassa à chëstes studëntes y chisc studënć laurè autonomamënter fora unitês didatiches metüdes a desposiziun dai maestri, d’atres tlasses à arjigné ca proieć desvalis.
Tres chëstes ativitês à les scores altes da La Ila podü pité a sües studëntes y a sü studënć n insegnamënt individualisé, cun tröpes ocajiuns por imparè da imparè y suradöt da svilupé competënzes importantes che an po adorè te y fora de scora.
