“Le coraje da…”
“Le coraje da…”
Ai 8 de merz, en ocajiun dla Festa dl' Ëra, ùn nos studëntes dla secunda tlassa dl lizeum linguistich fat na rapresentaziun teatrala, cun le titul “Le coraje da…”. Bel' tröc mëisc denant s’unse dè jö cun la tematica dla forza dl’ëra. Cun Erika Castlunger y les coordinadësses dl proiet Elisabeth Fistill y Raffaella Zingerle él gnü metü adöm n teater cun de plü scenes.
Al scomenciamënt él gnü tratè le cambiamënt dla moda ti agn. Do avëi intervisté nostes las y jënt plü de tëmp, unse capì che al n’é nia cossa da vigni dé podëi se vistì sciöch’an ó. Les foto dla studënta Ellen Alfreider, che s’à fotografè n domisdé te tlassa, à mostrè la moda d'al dedaincö. Mo sambëgn n’à nia dötes les ëres chësta liberté. Tla secunda scena él gnü cuntè la storia de Zeina, na jona musulmana che s’à rebelè a so om che la maltratâ. Sciöche Zeina, inće la todëscia Sophie Scholl à albü le coraje da dì süa minunga y à combatü por sü dërć cuntra le nazionalsozialism. Amesa les döes scenes, él gnü lit dant na poesia intitolada “Heute habe ich Blumen bekommen”, scrita da n’ëra de Südtirol, che à subì violënza: sciöche fomena maltratada y plëna de tëmes por sü mituns y por se instëssa, n’éra nia buna da sen jì da ćiasa y insciö vëgnera copada dal om. Tl final él gnü dit sö zitać de ëres che é stades importantes por l’umanité, por ejëmpl Rita Levi Montalcini, Frida Kahlo o Alda Merini.
Nos nü mitans n’ên nia atira a öna da portè dant le teater, deache se tëmôn dala paladina y dal publich. Mo plü inant, canche i un metü man da tratè i argomënć s’un interessè tres de plü por chësc proiet. Inće sce s’un dër devertì, n’él nia tres stè da rì dal momënt che tröć argomënć ê veramënter “pesoć”.
|
Chësc proiet s’à lié adöm tröp de plü sciöche tlassa inće sce n per de nos se cunosciô bel da dî. I un imparè da se azetè öna cun l’atra y da nia critiché sce valgügn se falâ. I un albü le coraje da se presenté dan n salf implinì de jënt y insciö s'en é jüda inće nosta tëma da baié dan d’atres porsones. Nos mitans dla secunda lizeum sun chersciüdes dötes cantes cun chësc proiet: i un madurí nostes idees, i un capí y tratè cun respet y serieté les tematiches.
I studënć Bryan James Bertoldi y Manuel Crazzolara à daidé les protagonistes Angelica Schanung, Anna Costamoling, Chiara Tavella, Debora Dellosto, Hannah Spechtenhauser, Ismahan Ouerghi, Jennifer Comploi, Nadine Pescoller y Nora Planatscher, a realisé le proiet. |
|
2 tlassa
Lizeum Linguistich La Ila
