Barcamp tl Ćiastel Maretsch - Eschool
In vëindres, ai 28 de setëmber, sunse jüs nos dui, Marco Granruaz y Manuel Valentin, cun le
prof. Reinhold Pescoller a Balsan, por tó pert a na incuntada organisada da TIS Innovation Park. Al é stè le prüm iade che les Scores Altes da La Ila à tut pert a na conferënza de chësta sort, y nos dui sun stà i unics studënć che à tut pert. L'incuntada ê liada al tema dl'informatica tles scores, y porchël é stè le resultat dl “Proiet Tablet” fat te nosta tlassa, adüm a de atres scores, le argomënt prinzipal de chësc dé.
L'incuntada é gnüda tignida tl Ćiastel Maretsch, y ara é gnüda fata sot ala forma de BarCamp, che ne à nia n program preodü, mo che à n ordinn dl dé metü sö al momënt dai partezipanć instësc.
Le dé ê partì sö te dües perts, üna dan marëna y üna do marëna.
Tla prüma pert, do da avëi definì le ordinn dl dé, ele stè n colaboradù dl TIS che à mostrè in cürt, tla forma de grafics, i resultać dla inrescida online metüda adüm da ël instëss. Sciöche düć se aspetâ, ê le esit bindebo negatif.
Dedô él gnü prejentè de atri proieć fać tles scores de Südtirol mo inće tl Trentin. Dëgns de gnì nunzià é n proiet fat dal TIS por realisé n program aposta por i tablet da lì PDF, y n ater por svilupé n sistem operatif por les scores, che pò interagì cun deplü aparać, p.ej. le telecomand dla Wii po gnì tut sciöche mouse.
Tla secunda pert dl'incuntada ê vigni partezipant invié a fà n cürt comentar sura le “proiet tablet”. I motifs prinzipai por le resultat negatif dl proiet é stà la stletiscima cualité dl tablet che é gnü partì fora, le stlet sostëgn y i gran problems che tröpes scores à albü por ći che reverda la conesciun Wi-Fi. Te chësc ultim punt à nosta scora albü n gran vantaje, deache ara à, inconfrunt a de atres scores, na conesciun internet bindebo asvelta. Implü à vignun albü la poscibilité de dè n valgügn consëis por le bun resultat de proieć tl ćiamp dl'informatica che gnarà realisà tl dagnì.
Chësta incuntada é stada dessigü dër istrutiva, deache da üna na pert éson gnüs sura de n grüm de proieć nüs che an po portè te scora, por modernisé y fà deventè la metoda de insegnamënt plü interessanta, inovativa y orientada al dagnì. D'ater cunt àn podü baié sura problems desvalis che reverda i proieć atuai, por che an pois miorè düt le sistem y finalmënter bel plan destënn fora sura düt Südtirol na scora informatisada, sciöche an ciafa bele tles scores plü avanzades de atri paîsc sciöche i USA o Deutschland.
