Dé pedagogich 2013
Dé pedagogich 2013
In jöbia, ai 4 de aurì à les scores altes ladines tignì n dé pedagogich tl zënter dles scores altes da La Ila. L’intendënt dot. Roland Verra, le diretur de ripartiziun dot. Alexander Prinoth, l’ispeturia dot. Romi Crazzolara, la direturia y i direturs dles scores y presciapüch 70 insegnantes y insegnanć dl Lizeum d’Ert, dl Istitut Tecnich Economich da Urtijëi, dl Lizeum Linguistich y dl Istitut Tecnich Economich da La Ila s’ à incuntè por tratè deplü cuestiuns en cunt dl’atuaziun dla reforma dla scora alta. De chësc vers é la manifestaziun stada na continuaziun dl dè pedagogich 2011, olache an â metü man da laurè sön i programs d’insegnamënt nüs. Te so salüt à l’intendënt dot. Verra sotrissé l’importanza dla formaziun plurilinguala che vëgn pitada dala scora ladina y alzè fora la nezescité de surantò por le dagnì na vijiun tres plü intersciplinara dl insegnamënt. | |
Dedô s’à les insegnantes y i insegnanć dè jö te deplü grups de laûr cun l’elaboraziun di curricula dles materies aladô dles Indicaziuns provinziales. Al é gnü analisé y valuté ći che é bel gnü arjigné ca tratan i ultims mëisc y dedô laurè fora i orientamënć por i programs dla terza, cuarta y cuinta tlassa. Denant co stlü jö le dé pedagogich él gnü tratè te na discusciun deplü aspeć dla reforma y dla realté dla scora ladina dal dedaincö.