La suzesciun de n'aziënda

La suzesciun de n'aziënda

Les tlasses cuarta y cuinta dl ITC da La Ila à albü la poscibilité de portè dant tratan les riuniuns dl' assoziaziun turistica dl'Alta Badia, tignides ai 12 y ai 13 de aurì a La Ila y a Colfosch, le proiet sura la suzesciun de aziëndes. 

En pêr de studëntes à portè dant sò laûr fat söla suzesciun tres n cajo che é gnü analisé dai studënć te chësc ann de scora.

Tratan la prejentaziun él gnü a löm i tröc problems che vëgn dant sciöche por ejëmpl i conflić generazionai. I punć plü importanć che é gnüs fora da nosc laûr é che por na suzesciun “hand in hand” ôl ester tröp tëmp. Chël ô dì che an mëss mëte man adora assà, inće agn denant, por organisé y planifiché la suzesciun. Al ti è gnü dè tröp pëis al dialogh danter geniturs y mituns, deache al è fondamental che vignun pois dì söa minunga y che an ćiari da ciafè na soluziun che vais adincuntra ai dejidêrs de düć.
Le suzessur mëss avëi la poscibilité da tó sö cualifiches nöies y se imparè ite te sò laûr nü, por valuté sce al dess mudé val’ tl’aziënda o nia. N ater punt fondamental é chël de fà n’analisa dl marćé, por capì ći poscibilitês che l’aziënda à te sò dagnì.
Na suzesciun fossl dërt da fà canche l’aziënda é te de bones situaziuns finanziares, por che i suzessurs n’àis nia massa n gran pëis sön les sciables.
Dër important é inće da tó sö contać con en consulënt co ti dàis sostëgn ala familia y con esperć co pois tlarì i aspeć iuridics y fiscai.
Desche an po odëi él gnü fat n bun laûr y an à ćiarè da portè a löm dötes les chestiuns importantes revardantes la suzesciun de aziëndes.
Cösc proiet ti va adencuntra con suzess a tröc jogn y families y a tröc operadûs tl ćiamp dl'economia.