Pröm dé de scora
Pröm dé de scora
Bele ai 5 de setëmber é la comunité dles scores altes da La Ila rovada adöm por le scomenciamënt dl ann de scora 2012/2013. Mai n’à la scora metü man tan adora – na conseguënza dl’introduziun dl’edema "cörta" te scora, mo inće n sëgn di tëmps, deache la sozieté daldedaincö reconësc tres deplü la gran importanza dla formaziun dles jones y di jogn.
Do la Santa Mëssa tla dlijia da La Ila y les beles parores de Siur Christian Moroder à le diretur Albert Videsott saludé düć i componënc dla comunité de scora: studëntes, studënć, insegnantes, insegnanć, geniturs, personal aministratif y de sorvisc. Al à sotrissé che le ann de scora nü portarà tröpes novitês, mo che le compit prinzipal dla scora restarà le medemo. Vigni scora mëss svilupé i talënć dles studëntes y di studënć y eduché le generaziuns nöies ai valurs che tegn sö nosta sozieté: liberté, democrazia, toleranza y responsabilité. Do avëi dè inant tröpes informaziuns ti à le diretur aodè a düć n bun ann de scora, cun tröpa ligrëza, fortüna, sanité y suzess. |
Spo é les studëntes y i studënć jüdes/jüs te sües tlasses, olache ai se à chirì fora i banc y incuntè cun les insegnantes y i insegnanć.
