Suzesciun de impreja
Conclujiun a Balsan dl proiet “Suzesciun de impreja”
En mertesc, ai 12 de jenà à les tlasses 4° y 5° dl ITC da La Ila prejentè cun
suzès i resultać dl proiet “Suzesciun de impreja” tla sënta dl' EURAC a
Balsan.
Scora – Da d'aisciöda dl 2009 ti êl gnü pité ales tlasses 4° y 5° dl ITC da La Ila l'ocajiun, da pert dl' EURAC y dl' Assoziaziun turistica Alta Badia, da tó pert a n proiet sura la suzesciun de impreja. Dô en valgünes sentades adöm ai rapresentanć dl'EURAC che, orun recordè, é n istitut europeich de inrescida, à i studënć dles scores altes da La Ila metü man ai 12 de otober n'edema de stüde y de elaboraziun de dać sura la suzesciun de impreja te nosc raiun. |
Sabine y Giulia, les döes raprejentantes dl'EURAC, à coordiné, adöm al
diretur Albert Videsott y ales professuries Elisabeth Frenner y Karin
Oberbacher, le proiet “Suzesciun de impreja”.
Le proiet é gnü fat con la colaboraziun dl'Assoziaziun turistica dl'Alta Badia con sü rapresentanć Damiano Dapunt, Andy Pertot, Ivon Canins, Roberta Rinna, Oscar Alfreider y Otmar Costabiei y dl proiet “Alta Badia: quo vadis?”.
Sostëgn y informaziuns ütles se à inće dè la filiala dla Cassa Raiffeissen da La Ila, le hotel La Majun, le espert de suzesciuns Alois Kronbichler y le comerzialist Dr. Fortunato Verginer. Implö à i studënć inće podü aldì l'esperiënza dla familia Hölzl por ći che reverda la
suzesciun dl hotel de familia.
Tratan l'edema de proiet à i studënć messü analisè, elaborè y mëte adöm scenars
poscibili de 5 caji concreć de suzesciun de impreja. I caji reverdâ n hotel,
na pensiun, n ristorant, na tislaria y na butëga. Inće sce le tëmp a
disposiziun n'é nia stè dër tröp, él gnü arjunt tratan chësta edema de bogn
resultać. Le proiet é gnü stlüt jö ai 12 de jenà dl 2010 tla sënta dl'EURAC a
Balsan. Te chësta ocajiun á i studënć podü prejentè cun suzès un di 5
poscibili scenars de suzesciun che é spo gnüs comentà da esperć.
L'obietif dl proiet é stè chël de fà cunësce ala generaziun jona l'importanza
dla suzesciun de impreja te nosta valada y i problems cun chi che an mëss se
confrontè tl cajo de suzesciun (conflić familiars, tëmps de atuaziun dla
suzesciun, ...). Le proiet é stè important inće deache tröc studënć à instësc
geniturs che à n'impreja y à spo podü insciö cöie informaziuns che podess ti oghé tl
dagnì tl cajo de na suzesciun.
I studënć tol ćiamò l'ocajiun da rengraziè düć i rapresentanć, esperć,
professurs y imprenditurs che se à dè jö cun tröp impëgn pur la buna
realisaziun de chësc proiet.
les tlasses 4. y 5. ITC La Ila