Sojornanza linguistica tl'Irlanda

INVAJIUN LADINA TL' IRLANDA

Dai 5 ai 12 de merz à les terzes tlasses dl lizeum linguistich y dl ITC da La Ila podü jì n’edema tl' Irlanda por na sojornanza linguistica.

Ai 5 de merz ùnse nos studënć y studëntes dles terzes tlasses dles scores altes da La Ila podü jì tl’Irlanda por na sojornanza linguistica. Ćina Bergamo ùnse tut la coriera por spo jorè ćina Dublin. I ùn albü dër na gran furtüna cun l’tëmp deache i n'ùn odü döta l’edema gnanca na gota de plöia. I sun gnüs tuć sö da singoles families por imparèinsciö damì l’ingleje y i ùn inće podü a chësta manira ciarćé mangiaries tipiches irlandejes.

Tratan chëst’edema ùnse albü la poscibilité da jì vigni dé a scora, da baié y imparè l’ingleje; al s’é gnü insigné ćianties tipiches, i ùn ciafè informaziuns sura les tradiziuns irlandejes y i ùn aldì tröpes d’atres cosses interessantes.

I sun inće jüs a vijité posć importanć fora dla storia irlandeja, sciöche p.ej. Belfast, na cité tl nord dl’ Irlanda che toca pro l’Inghiltera, olache catolics y protestanć vir ćiamò aldedaincö te n conflit. Danter ater él tla cité de Belfast inće gnü costruì la barca Titanic ti prüms agn dl 1900, l’transatlantich che é spo jü sot amesa l'ozean Atlantich.

I ùn imparè che la popolaziun irlandeja ê deventada cristiana do che San Patrick ti â fat conësce chësta religiun. A chësc vësco ti él gnü dediché spo na bela gran catedrala che i ùn inće podü vijité.

A Dublin, che é la capitala dl’ Irlanda, sunse spo inće jüs a ti ćiarè ala fabrich dla “Guinness”, che é la bira plü conesciüda dl’ Irlanda. Vijité ùnse inće l’université plü vedla dla cité, olache al è da odëi “The Book of Kells”, n liber vedl dër prezius por sü scrić y por söes beles decoraziuns.

I ùn albü l’ ocajiun da odëi n pub tradizional, da ascutè musiga irlandeja y da imparè da la balè. Les sëres ùnse nos studënć passè deboriada con i professurs, p.e. i sun jüs al chino, a chidlé, a ti ćiarè a n film organisé dala scora.

Al s’à ala fin salpü dër sciode da lascè chësc bel post plëgn de bi momënć passà deboriada, mo tl medemo tëmp ênse inće contënć da gnì indô zoruch a ćiasa.

I orun chilò inće tó l'ocajiun por ringrazié i professurs Ester Tavella Moling y Christian Ferdigg che s’à acompagné te chësc iade tl’Irlanda y che s’à fat passè de bi mumënć deboriada.

3. ITC y 3. Lizeo Linguistich La Ila