SCINCHÉ TRES I DESSËGNS

“SCINCHÉ TRES I DESSËGNS”: N proiet dl’ AIDO te scora

En mertesc, ai 12 de jenà, é gnüda inaugurada tla Ćiasa dla Cultura da La Ila la mostra de dessëgns fać da nos studënć dl Lizeum Linguistich da La Ila tl cheder de n proiet metü a jì en colaboraziun cun l’AIDO (Assoziaziun Taliana por la Donaziun di Organs). Dan da n pêr d’agn à l’AIDO metü man da gnì te nosta scora por nes sensibilisé sön la chestiun dla donaziun di organns. Três referać y documentars s’ai mostrè sö l’ativité che ai porta inant cun süa assoziaziun y ai s’à damanè nosta disponibilité por daidé purtè inant n messaje de solidarieté. Nos studënć de cuarta da chësc ann y chi dla cuinta dal ann passè ùn azeté cun plajëi. Da chël momënt inant -adüm al professur Carlo Suani por la cordinaziun y a Maria Pezzedi da San Ćiascian, chëra che s’á daidé tla tecnica de realisaziun di dessëgns - ùnse metü man da laurè fajon les prümes schizes y punsan ai prüms proieć. Ala fin dl ann s’à nostes fadies stlüt jö y i ùn albü l’plajëi da pudëi mëte fora n valgügn de nüsc laûrs a Corvara en gaujun dla Maratona dles Dolomites. La presidënta dla seziun da Balsan dl AIDO, Annamaria Saviolo, é stada dër cuntënta cun nüsc dessëgns y ara à urü porchël i mëte fora ćiamò n iade por che la jënt pois ti ćiarè y se fà n pic pinsier. L’AIDO é n assoziaziun de volontars che se crüzia de damanè ales porsones süa disponibilité por la donaziun di organns dô la mort. Nos aratun che chësta sides na cossa dërta y i ùn porchël orü se mëte a desposiziun por chësc proiet.

Studënć dla IV lizeum da La Ila