Patent europeica dl computer
Patent europeica dl computer
Tl cheder dl proiet „ECDL“ dles scores altes da La Ila à la studënta Jasmine Bassetto (3° tlassa Lizeum Linguistich) y i studënć Nicola Vendramini (3° ITC) y Lukas Rubatscher (3° LL) arjunt por pröms le diplom ECDL do avëi superé dötes les proes d’ejam. Gratulaziuns da pert dla comunité dla scora!
Le diplom ECDL (European Computer Driving Licence) é na zertificaziun reconesciüda a livel internazional che atestëia conoscënzes de basa y competënzes de programs standard tl’adoranza dl computer. I ejams revardëia 7 ćiamps de savëi informatich:
Modul 1: Savëi de basa dla tecnica dl’informaziun
Modul 2: Adoranza dl computer y sistems operatifs
Modul 3: Elaboraziun de tesć
Modul 4: Sfoi de calcul
Modul 5: Banches dates
Modul 6: Presentaziun
Modul 7: Informaziun y comunicaziun (Internet, E-mail)
Dal ann de scora 2008/2009 inant vëgn i contegnüs dl ECDL tratà avisa tles materies EDV, Informatik y Informatica applicata, mo inće te cursc a pert. Insciö ciafa les studëntes/i studënć tl biennium dles döes scores na buna preparaziun por to pert ales proes d’ejam. Le proiet vëgn coordiné dal’insegnanta Dr. Elena Pellegrini che acompagnëia inće les studëntes /i studënć ales proes d’ ejam tla scora profescionala da Bornech.
L’ECDL ne é nia na zertificaziun por spezialisć dl computer, mo atestëia na buna conoscënza de basa dles tecniches informatiches. De gran importanza é che chësc diplom vëgn damanè aldedaincö tres deplü tl monn dl laûr y dla formaziun.